உங்கள் விதியை மாற்றும் மூளையின் ரகசியம்: ‘ஆர் ஏ எஸ்’ (RAS) என்னும் அற்புத சாவி!

ஆனந்த் I இன் மீடியா I விஸ்டம் நியூஸ்

உங்கள் வாழ்க்கை எவ்வித முன்னேற்றமும் இல்லாமல் ஒரே மாதிரி போய்க்கொண்டிருப்பது போல் உணர்கிறீர்களா? எப்போதும் ஏதோ ஒரு விஷயத்தைப் பற்றி அதிகமாகச் சிந்தித்துக் கொண்டு, மன அழுத்தத்தில் இருக்கிறீர்களா? அல்லது கடவுளைத் தீவிரமாகத் தேடிக் கொண்டும், வாழ்க்கையை உயர்த்த எத்தனையோ முயற்சிகள் மேற்கொண்டும் எதிலுமே வெற்றி கிடைக்காமல் தவித்துக் கொண்டிருக்கிறீர்களா? “ஏன் எனக்கு மட்டும் இப்படி நடக்கிறது?” என்று எப்போதாவது நீங்கள் யோசித்தது உண்டா? அப்படி என்றால், உங்களுக்காக எழுதப்பட்ட விசேஷமான பதிவுதான் இது! மாபெரும் ரகசியத்தை உணர்ந்து கொள்ள, முதலில் ஒரு சிறிய கடற்பயணக் கதையோடு ஆரம்பிக்கலாம்.

அடிவானம் வரை நீல நிறமாய் விரிந்து கிடக்கிறது அந்தப் பெருங்கடல். மாலை நேரத்துக் காற்று பலமாக வீச, அலைகள் சீறிக்கொண்டு வந்து அந்தப் படகின் மீது மோதி, அதை மேலும் கீழுமாய் ஆட்டின. அந்தப் படகில் **பால்**, **ஆனந்த்** ஆகிய இரண்டு மனிதர்கள் அருகருகே நின்று கடலைப் பார்த்துக் கொண்டிருந்தார்கள். எதிர்மறை எண்ணங்கள் கொண்ட பால் என்பவரின் முகம் பயத்தாலும் சோர்வாலும் வெளிறிப் போயிருந்தது. கடலின் மாபெரும் இரைச்சல் அவனுக்கு ஒரு அச்சுறுத்தலாகக் கேட்டது. அவனது கவனம் முழுவதும் கடலின் ஆபத்துகள் மீதே இருந்ததால், அவனுக்குக் கடல் ஒரு அச்சமூட்டும் நரகமாகத் தெரிந்தது.

ஆனால், அவனுக்கு மிக அருகிலேயே நின்றிருந்த ஆனந்தோ முற்றிலும் மாறுபட்ட ஒரு துணிச்சலான மனநிலையில் இருந்தார். அதே அலைகளின் ஓசை ஆனந்துக்கு ஒரு கம்பீரமான ராகமாகத் தெரிந்தது. “என்ன ஒரு பிரம்மாண்டம்! இந்த ஆழ்கடல் நமக்குள்ளே ஒரு மாபெரும் சக்தியையும், புது ஆற்றலையும் விதைக்கிறதே!” என்று ஆனந்த் இயற்கையின் அழகையும் நம்பிக்கையோடு மனதார ரசித்தார். இருவரும் பயணிப்பது ஒரே கடலில் தான். ஆனால், பாலுக்கு அது அச்சத்தையும், ஆனந்துக்கு அது பேராற்றலையும் தந்தது எப்படி? கடல் மாறவில்லை; அவர்கள் மூளைக்குள் இருந்த ஒரு அற்புத வடிகட்டிதான் அவர்களின் சிந்தனைக்கு ஏற்ப, உணர்வுகளைத் தேர்ந்தெடுத்துக் காட்டியது.

நரம்பியல் மற்றும் உயிரியல் ரீதியாக இந்த வடிகட்டிக்கு **RAS (Reticular Activating System – வலைப்பின்னல் தூண்டல் அமைப்பு)** என்று பெயர். இது நம் மூளையின் தண்டுப் பகுதியில் (Brainstem) அமைந்துள்ள நரம்புகளின் ஒரு சிறிய தொகுப்பு ஆகும். நம்மைச் சுற்றி ஒவ்வொரு நொடியும் கொட்டிக்கிடக்கும் லட்சக்கணக்கான தகவல்களில், எதை நம் விழிப்புணர்வுக்கு அனுப்ப வேண்டும், எதை நிராகரிக்க வேண்டும் என்பதைத் தீர்மானிக்கும் மூளையின் முதன்மை வாயிற்காவலன் இதுதான்.

நம்மைச் சுற்றி நடக்கும் பல விஷயங்களில், நாம் ஏன் வாழ்க்கையில் அடுத்த கட்டத்திற்கு முன்னேற முடிவதில்லை தெரியுமா? நம்முடைய தவறான சிந்தனைப் பழக்கவழக்கங்களால் இந்த ஆர் ஏ எஸ் சிஸ்டத்தை நாம் எதிர்மறையாகத் தூண்டிவிடுவதுதான் காரணம். நாம் எப்போதும் நம்முடைய பழைய தோல்விகள், சோகம், பயம் போன்ற எண்ணங்களையே அசைபோட்டுக் கொண்டிருக்கும்போது, ஆர் ஏ எஸ் அதை ஒரு கட்டளையாக ஏற்றுக்கொண்டு, நிஜ வாழ்க்கையிலும் தோல்விகளையும் பயத்தையுமே நமக்குக் காட்டும். குறிப்பாக, கவனக் குறைவாக மற்றவர்களைப் பற்றிப் பேசுவது, வீண் வதந்திகள், மற்றும் தேவையில்லாத பிற சிந்தனைகளில் நம் நேரத்தைச் செலவிடும்போது, நம் மூளையின் இந்த வடிகட்டி தேவையற்ற குப்பைகளைத் தேடும் கருவியாக மாறிவிடுகிறது. பிறரைப் பற்றிப் பேசப் பேச, நம் சொந்த முன்னேற்றத்திற்கான வாய்ப்புகளை இந்த ஆர் ஏ எஸ் நம் கண்ணுக்குத் தெரியாமல் அப்படியே மறைத்து, நம் லட்சியப் பயணத்தைத் தடுத்து நிறுத்திவிடுகிறது. மது, போதை போன்ற தீய பழக்கவழக்கங்களில் சிக்கியவர்களின் ஆர் ஏ எஸ், எப்போதும் அந்தப் போதைக்கான சிக்னல்களையே தேடித் தேடி வடிகட்டித் தருவதால் அவர்களால் அதிலிருந்து எளிதில் மீள முடிவதில்லை.

பல நேரங்களில் மத வழிபாடுகளும் சடங்குகளும் மனிதனை ஒரு அறியாமைக்குள்ளும் அடிமைத்தனத்திற்குள்ளும் தள்ளிவிடுகின்றன. மனிதனை அடிமையாக்கி வைத்திருக்கும் இந்த மதச் சூழலில் ஆர் ஏ எஸ் எப்படி வேலை செய்கிறது என்பதை நாம் உற்று நோக்க வேண்டும். ஒருவர் மதத்தின் பெயரால் தன்னை ஒரு “பாவி” என்று நினைத்துக் கொண்டோ, அல்லது தன் கஷ்டங்களை நினைத்து அழுது புலம்பிக்கொண்டோ இருக்கும்போது, அவரது ஆர் ஏ எஸ் சிஸ்டம் அந்தச் சோகத்தையும் வலியையும் தான் அவருக்கு வாழ்க்கையில் அதிகமாகக் கொண்டு வந்து சேர்க்கும். என் வாழ்க்கை இவ்வளவுதான்” என்று மத ரீதியாகத் தங்களை ஒடுக்கிக் கொள்பவர்களுக்கு, அவர்கள் சுற்றியுள்ள நரகத்தைத்தான் ஆர் ஏ எஸ் வடிகட்டிக் காட்டும்.

நீங்கள் உற்சாகத்தோடும் புத்துணர்வோடும் வாழ்க்கையில் முன்னேற வேண்டும் என்ற கனவையும் லட்சியத்தையும் கொண்டு, அதை உங்கள் மனதில் ஆழமாக விதைத்து செயலாற்றும்போது மட்டும்தான், இந்த ஆர் ஏ எஸ் உங்களுக்கான மாபெரும் வெற்றிக் கருவியாக மாறும்.

நவீன நரம்பியல் விஞ்ஞானியான **டாக்டர் ஆண்ட்ரூ ஹூபர்மேன் (Dr. Andrew Huberman)** போன்ற ஆய்வாளர்களின் கூற்றுப்படி, நம்முடைய கவனத்தைக் கட்டுப்படுத்துவதன் மூலம் மூளையின் நரம்புப் பாதைகளை (Neuroplasticity) நம்மால் மாற்றியமைக்க முடியும். இந்த ஆர் ஏ எஸ் சிஸ்டத்தை நம் வெற்றிக்காகத் தூண்டிவிட சில எளிய உத்திகளை நாம் கையாள வேண்டும். முதலாவதாக, உங்களுக்கு என்ன வேண்டும் என்பதைத் தெளிவாக டைரியில் எழுத வேண்டும்.

நீங்கள் எழுதும்போது, உங்கள் ஆர் ஏ எஸ் அந்த இலக்கை மிக முக்கியமானது எனப் பட்டியலிட்டுக் கொள்ளும். இரண்டாவதாக, நீங்கள் அடைய நினைக்கும் இலக்கை ஏற்கனவே அடைந்துவிட்டது போல தினமும் சில நிமிடங்கள் மனக்கண்ணில் காட்சிப்படுத்த (Visualization) வேண்டும். ஆர் ஏ எஸ்-க்குக் கற்பனைக்கும் நிஜத்திற்கும் வித்தியாசம் தெரியாது என்பதால், அது நிஜமாகவே அதற்கான வழிகளைத் தேடத் தொடங்கும்.

மூன்றாவதாக, நம்முடைய சுய உரையாடல் மற்றும் வார்த்தைகளை மாற்ற வேண்டும். அதற்கு முன்பாக, **நம்மை நாம் முதலில் சுய பரிசோதனை செய்து, நம்மை நாமே எப்போதும் உயர்த்திப் பிடிக்க வேண்டும்.** நமக்கான ஒரு உயர்ந்த பார்வை நமக்கு எப்போதும் இருக்க வேண்டும். நாம் எப்போதும் ஒரு நல்ல மனநிலையில் இருந்து, **”நாம் நல்லவர்கள், நன்மையாகவே செய்வோம், நம் வாழ்வில் நிச்சயம் உயர்வோம்”** என்ற எண்ணத்தோடு நம்முடைய சுய மதிப்பீட்டை (Self-Esteem) உயர்த்திக் கொள்ள வேண்டும். இப்படி நம்மைப் பற்றிய சுய மதிப்பீட்டை நாம் உயர்த்திப் பிடிக்கும் போது, இந்த ஆர் ஏ எஸ் நம்மை ஒரு உயர்வான மனிதனாக உலகிற்கு வெளிப்படுத்துவதற்கான வழிகளை மூளைக்குள் தூண்டத் தொடங்கும்.

இதேபோல் ஒரு மாணவனுக்கும் அவனுக்கு நல்லா படிக்க முடியாது, படிக்கத் தெரியாது என்ற அந்த வாய்மொழி அடையாளத்தை அவனோடு திணிக்காமல், அவனுக்குள் இருக்கும் சிறு திறமைகளைப் பாராட்டி, “நீ ஒரு நல்ல மாணவன், நன்றாகப் படிக்கிறாய், உன்னால் மிகச் சிறப்பாகச் சாதிக்க முடியும்” என்று பெருமை பாராட்டி நேர்மறை வார்த்தைகளை விதைக்க வேண்டும். அப்போது அவனது ஆர் ஏ எஸ் படிப்பதற்கான ஆசையையும் ஆர்வத்தையும் மூளையின் உள்ளே இருந்து தானாகவே தூண்டத் தொடங்கும். இதேபோல் போதைப் பழக்கம் உள்ளவர்கள், “நான் ஒரு ஆரோக்கியமான மனிதன்” என்று தன் எண்ணங்களை மாற்றி புதிய இலக்குகளை நோக்கிப் பயணிக்கும் போது, பழைய பழக்கவழக்கங்களுக்கான சிக்னல்களை ஆர் ஏ எஸ் தானாகவே வடிகட்டிவிடும்.

இதற்கு உலகப் புகழ்பெற்ற சாதனையாளர் **ஜிம் கேரி (Jim Carrey)** மிகச்சிறந்த உதாரணம். வறுமையில் இருந்தபோதே, அவர் தனக்குத்தானே 10 மில்லியன் டாலர் போலிச் செக் எழுதி பர்சில் வைத்துக் கொண்டு தினமும் அதை ஆழமாகப் பார்த்தார். அவரது ஆர் ஏ எஸ் அந்த இலக்கை அடையத் தேவையான வாய்ப்புகளை மட்டுமே அவரது கவனத்திற்குக் கொண்டு வந்து, அவரை உலகமறியும் சாதனையாளராக மாற்றியது. இதுதான் ஈர்ப்பு விதியின் அறிவியல் பின்னணி (Science behind the Law of Attraction). நீங்கள் எதை ஆழமாக நம்புகிறீர்களோ, அதற்கான சிக்னல்களை மூளைக்குள் ஆன் செய்து, பிரபஞ்சத்தில் இருக்கும் அந்த வாய்ப்புகளை உங்களை நோக்கி ஈர்ப்பதே இந்த ஆர் ஏ எஸ் தான்.

எனவே, பிறரைப் பற்றிய வீண் பேச்சுகளையும், பழைய சோகங்களையும் பேசுவதை இன்றோடு நிறுத்துவோம். மத அடிமைத்தனங்களில் இருந்தும், பாவி என்ற புலம்பல்களில் இருந்தும் நம்மை விடுவித்துக் கொண்டு, நம்முடைய எண்ணங்களைச் சரிசெய்து, உயர்வான லட்சியங்களை நோக்கி நம் ஆர் ஏ எஸ் வடிகட்டியைத் திருப்புவோம். இந்த பூமியில் நாம் வாழும் குறுகிய காலத்தில், நேர மேலாண்மையையும் ஈர்ப்பு விதியையும் சரியாகப் பயன்படுத்தி, நன்மதிப்பு மிக்க மனிதர்களாக வாழ்ந்து, நல்ல பல விஷயங்களை உலகிற்கு விட்டுச் செல்ல இந்த மூளையின் சாவியைச் சரியாகப் பயன்படுத்துவோம்!