ஆய்வும் மாற்றத்தின் அதிரடியும்.

கடந்த காலங்களில் அரசு அதிகாரிகள் அல்லது உயர்மட்ட நிர்வாகிகள் ஆய்வுக்கு வருகிறார்கள் என்ற தகவல் முன்கூட்டியே தெரிவிக்கப்படும். அதன் பிறகு சம்பந்தப்பட்ட இடங்கள் முழுமையாக சுத்தம் செய்யப்பட்டு, அனைத்தும் , பார்ப்பதற்கு சிறப்பாகத் தயார்படுத்தப்படும். ஆய்வு நடைபெறும் அந்த நாளில் உணவு முதல் சுகாதாரம் வரை அனைத்தும் சிறப்பாக இருப்பது போன்ற தோற்றம் உருவாக்கப்படும். அந்த ஒரு நாள் நிலையை மட்டுமே அடிப்படையாகக் கொண்டு ஆய்வுகள் நிறைவடையும் சூழல் பல இடங்களில் இருந்து வந்ததாக பொதுமக்கள் மத்தியில் நீண்டகாலமாக ஒரு கருத்து நிலவி வருகிறது.

ஆனால், தற்போது பொறுப்பேற்றுள்ள முதல்வர் விஜய் அவர்கள் அந்த நடைமுறையிலிருந்து மாறுபட்ட அணுகுமுறையை எடுத்திருப்பதாக இந்த நிகழ்வு காட்டுகிறது.

இன்று சென்னை சைதாப்பேட்டையில் உள்ள எம்.சி. ராஜா சமூக நீதி விடுதியில் முதல்வர் விஜய் திடீர் ஆய்வு மேற்கொண்டார். விடுதியில் நிலவும் குறைகள் தொடர்பாக வந்த புகார்களின் அடிப்படையில் இந்த ஆய்வு நடைபெற்றதாகத் தகவல்கள் தெரிவிக்கின்றன.

ஆய்வின் போது அங்கிருந்த மாணவர்கள் தங்களது பிரச்சினைகளையும் கோரிக்கைகளையும் நேரடியாக முதல்வரிடம் எடுத்துரைத்தனர்.

• தரமான உணவு வழங்கப்படவில்லை; உணவின் தரம் மற்றும் சுகாதாரம் குறித்து குறைகள் உள்ளன.
• விடுதிக் கட்டிடங்கள் சரிவர பராமரிக்கப்படவில்லை.
• குடிநீர், மின்சாரம் உள்ளிட்ட அடிப்படை வசதிகள் போதுமானதாக இல்லை.
• விடுதியின் சுத்தம் போதுமான அளவில் பராமரிக்கப்படவில்லை.
• அவசர மருத்துவ வசதிகள் இல்லை.
• பாதுகாப்பு ஏற்பாடுகள் வலுப்படுத்தப்பட வேண்டும்.
• தற்போது ஒரு மாணவருக்கு நாள் ஒன்றுக்கு வழங்கப்படும் ₹50 உணவுத் தொகை போதுமானதாக இல்லை; அதை குறைந்தபட்சம் ₹150 ஆக உயர்த்த வேண்டும் என்று மாணவர்கள் கோரிக்கை விடுத்தனர்.
• மேலும், ஆய்வு நடைபெறும் நேரத்தில் மட்டும் குறைகள் சரிசெய்யப்படுகின்றன. ஆனால் ஐந்து நாட்கள் அல்லது ஒரு மாதம் கழித்து மீண்டும் பழைய நிலையே தொடர்கிறது; உரிய பராமரிப்பும் தொடர்ச்சியான நடவடிக்கைகளும் மேற்கொள்ளப்படுவதில்லை என்றும் மாணவர்கள் தங்களது வேதனையை முதல்வரிடம் தெரிவித்தனர்.

இந்தக் கோரிக்கைகளையும் குறைகளையும் கவனமாகக் கேட்ட முதல்வர் விஜய், சம்பந்தப்பட்ட அதிகாரிகள் உடனடியாக நடவடிக்கை எடுத்து, மாணவர்கள் குறிப்பிட்டுள்ள அனைத்து பிரச்சினைகளுக்கும் விரைவாக தீர்வு காண வேண்டும் என்று வலியுறுத்தி உத்தரவிட்டதாகத் தகவல்கள் தெரிவிக்கின்றன. மேலும், இதுபோன்ற குறைகள் மீண்டும் ஏற்படாத வகையில் தொடர்ந்து கண்காணித்து செயல்பட வேண்டும் என்றும் அதிகாரிகளுக்கு அறிவுறுத்தியுள்ளதாக கூறப்படுகிறது.

இந்த ஆய்வு ஒரு நாள் நிகழ்வாக மட்டுமே இருந்து விடக் கூடாது. மாணவர்களுக்கு அறிவிக்கப்பட்ட நடவடிக்கைகள் உண்மையில் செயல்படுத்தப்படுகிறதா என்பதையும் தொடர்ந்து கண்காணிக்கும் அமைப்பு அவசியம். ஆய்வுக்குப் பிறகு சில நாட்கள் மட்டுமல்லாமல், மாதங்கள் கடந்த பின்னரும் அதே தரமான வசதிகள் தொடர்கிறதா என்பதை உறுதி செய்யும் நிரந்தர கண்காணிப்பு முறையும் இருக்க வேண்டும். அதற்காக சம்பந்தப்பட்ட அமைச்சர்கள் மற்றும் அரசு அதிகாரிகள் மாதந்தோறும் அல்லது காலாண்டுக்கு ஒருமுறை இதுபோன்ற திடீர் ஆய்வுகளை மேற்கொள்ள வேண்டும். ஆய்வின் முடிவுகள் மற்றும் எடுக்கப்படும் நடவடிக்கைகள் வெளிப்படையாக மக்களுக்கும் பயனாளிகளுக்கும் தெரியப்படுத்தப்பட வேண்டும்.

சமூக நீதி விடுதிகள் மட்டுமல்லாமல், அரசு மற்றும் தனியார் முதியோர் இல்லங்கள், அனாதை குழந்தைகள் இல்லங்கள், மாற்றுத்திறனாளிகள் நல மையங்கள், அரசு மற்றும் தனியார் மருத்துவமனைகள், சுகாதார நிறுவனங்கள் மற்றும் பொதுமக்கள் அரசு சேவைகளைப் பெறும் அனைத்து நிறுவனங்களிலும் இதுபோன்ற அதிரடியான, வெளிப்படையான மற்றும் திடீர் ஆய்வுகள் தொடர்ந்து நடைபெற வேண்டும்.

பல இடங்களில் போதிய வசதிகள் இல்லாமல் வாழும் மக்கள், தங்களது பிரச்சினைகளை மனதிற்குள் வைத்துக்கொண்டு, ஒரு மாற்றம் எப்போது வரும் என்ற நம்பிக்கையோடு காத்திருக்கின்றனர். அவர்களிடம் நேரில் சென்று, அவர்களின் குரலைக் கேட்டு, குறைகளை உடனடியாகத் தீர்க்கும் நிர்வாக அணுகுமுறை உருவானால், அது மக்களின் மனதில் அரசின் மீதான நம்பிக்கையை மேலும் வலுப்படுத்தும்.

முதல்வர், அமைச்சர்கள் மற்றும் அதிகாரிகள் இதுபோன்ற கள ஆய்வுகளை அனைத்து துறைகளிலும் தொடர்ந்து மேற்கொண்டால், மக்கள் தங்களது குறைகள் உண்மையாகக் கேட்கப்படுகின்றன என்ற நம்பிக்கையைப் பெறுவார்கள். மக்களின் வாழ்க்கைத் தரத்தை உயர்த்தும் இந்த அணுகுமுறை நீடித்த நிர்வாகப் பண்பாக மாற வேண்டும் என்பதே Wisdom News-இன் கருத்தாகும்.

#CMVijay #SocialJusticeHostel #StudentWelfare #TamilNadu #Transparency #PublicService #WisdomNews

Wisdom News – மக்களின் பக்கம்!