“மனித ஆயுட்காலத்தை கேள்விக்குறியாக்கும் மலங்கள்”
“ஆரோக்கியம் குறித்த விழிப்புணர்வு அதிகரித்துள்ள இக்காலத்தில், மனிதன் தன் உடலைப் பாதுகாக்க பல வழிகளைத் தேடிக்கொள்கிறான். ஆனால் அவன் கவனிக்காத, தினசரி அவனைச் சூழ்ந்திருக்கும் ஒரு அமைதியான அச்சுறுத்தல் உள்ளது — ‘மலங்கள்’. அதுவே ஆயுட்காலத்தையே கேள்விக்குறியாக்கும் ஒரு மறைமுக நச்சாக மாறி வருகிறது.”
நாம் அறிந்தோ அறியாமலோ எதிர்கொள்ளும் சுற்றுச்சூழல் அச்சுறுத்தலே உண்மையான காரணமாக இருக்கலாம்.
குப்பைகள், தொழிற்சாலைக் கழிவுகள் மட்டுமின்றி, நம்மையும் நம் செல்லப்பிராணிகளையும் சுற்றியுள்ள உயிர்க்கழிவுகளும் கண்ணுக்குத் தெரியாத கிருமிகளின் கூடாரங்கள் என்பதை நாம் பெரும்பாலும் அறிவதில்லை. இந்தப் பதிவானது, மனிதன், நாய், பூனையின் மலங்கள் பொதுச் சுகாதாரத்தில் ஏற்படுத்தும் பாதிப்புகள் குறித்த ஒரு புரிதலைத் தருகிறது.
நாயின் மலத்தில் வட்டப்புழு (Toxocara canis) ஒட்டுண்ணி, சால்மோனெல்லா (Salmonella), மற்றும் கேம்பைலோபாக்டர் (Campylobacter) போன்ற கிருமிகள் நிறைந்துள்ளன. நாயின் மலத்தால் அசுத்தமான மண்ணில் விளையாடும் குழந்தைகளுக்கு பார்வை இழப்பை (Toxocariasis) ஏற்படுத்தக்கூடிய வட்டப்புழு தொற்றுக்கான ஆபத்து மிக அதிகம் என ஆய்வுகள் உறுதிப்படுத்துகின்றன.
பூங்காக்களில் விளையாடும் குழந்தைகளுக்கும், வீதியோரக் கடைகள் அல்லது தெருவோரங்களில் தரையில் வைக்கப்படும் உணவுகளில் ஈக்கள் மூலம் தொற்று பரவும்போது, அங்கு டீ அருந்துபவர்களுக்கும், உணவு உண்பவர்களுக்கும் இந்தக் கழிவுகள் மூலம் நோய் பரவும் அபாயம் உள்ளது. பூனையின் மலத்தில் டாக்சோபிளாஸ்மா கோண்டி (Toxoplasma gondii) என்ற ஒட்டுண்ணி உள்ளது, இது கர்ப்பிணிப் பெண்களுக்குக் கருச்சிதைவு உட்படப் பல சுகாதார சிக்கல்களை உண்டாக்கும்.
மனிதக் கழிவுகளும் அதிக ஆபத்தானவை; திறந்தவெளியில் மலம் கழிக்கும்போது டைபாய்டு (Salmonella Typhi), காலரா (Vibrio cholerae), மற்றும் ஹெபடைடிஸ் A வைரஸ் போன்ற கடுமையான நீர்வழி நோய்த்தொற்றுகள் வேகமாகப் பரவுகின்றன என உலக சுகாதார நிறுவனம் (WHO) சுட்டிக்காட்டுகிறது.
இந்தக் கழிவுகள் மழைநீருடன் கலந்து நீர்நிலைகளை அசுத்தப்படுத்துவதால், நீர்வழி நோய்த்தொற்று அபாயம் அதிகரிக்கிறது. மேலும், நாயின் மலத்தில் உள்ள வட்டப்புழு முட்டைகள் மண்ணில் பல ஆண்டுகள் உயிர்ப்புடன் இருக்கும் தன்மை கொண்டதால், இது மண்ணை நீடித்த ஆபத்துக்குள்ளாக்குகிறது.
காய்ந்த கழிவுகள் தூசியுடன் கலந்து சுவாசக் குழாய் வழியாகவும் தொற்றுக்களைப் பரப்ப வாய்ப்புகள் உண்டு. இந்த இரண்டு வகையான கழிவுகளும் பொது இடங்களில் சேருவதைத் தடுத்தல், முறையான குடற்புழு நீக்கம் மற்றும் கழிவறை பயன்பாடு மட்டுமே சுகாதாரமான வீதிகளுக்கும் பாதுகாப்பான வாழ்க்கைக்கும் வழிவகுக்கும். நாயின் மலத்தை அதன் உரிமையாளர் உறுதியான பிளாஸ்டிக் பைகள் பயன்படுத்தி உடனடியாக அகற்ற வேண்டும்; பூனை வளர்ப்பவர்கள் அதன் கழிவறைப் பெட்டியை (Litter Box) தினசரி சுத்தம் செய்ய வேண்டும்.
வீதியோரங்களில், பொது இடங்களில் மனிதன் மற்றும் செல்லப்பிராணிகளின் மலங்கள் அகற்றப்படாமல் இருப்பது பொதுச் சுகாதாரத்தின்மீது தொடுக்கப்படும் தாக்குதல் ஆகும். சுத்தமான வீதிகளும், பாதுகாப்பான சுற்றுப்புறமும் நம் ஒவ்வொருவரின் கடமையாகும்; இந்தச் சுகாதாரப் பழக்கங்கள்தான் நம் ஆயுட்காலத்தை நீட்டிக்க உதவும் உண்மையான கவசமாகும்.
🟢 நாம் ஒவ்வொருவரும் தினமும் சுத்தம் மற்றும் பொது சுகாதாரத்தைப் பாதுகாக்கும் ஒரு சிறு நடவடிக்கையாவது எடுப்போம் என்றால், சமூகத்தின் உயிர் ஆற்றல் நிச்சயம் உயரும்.
