Gen Z (ஜென்சி) அலையும் மாறும் அரசியல் முகமும்

Wisdom News I Anand'ஜென்சி' (Gen Z - 1997 முதல் 2012 வரை பிறந்தவர்கள்) தலைமுறையினர் உலகம் முழுவதும் முன்னெடுக்கும் போராட்டங்கள், பாரம்பரிய அரசியல் வடிவங்களை உடைத்து புதிய உலகளாவிய மாற்றத்திற்கு வித்திட்டு வருகின்றன. பங்களாதேஷின் ஆட்சி மாற்றம், கென்யாவின் வரி எதிர்ப்பு, ஜெர்மனியின் ராணுவச் சேவை எதிர்ப்பு மற்றும் இந்தியாவின் நீட் தேர்வு முறைகேடுகளுக்கான போராட்டங்கள் என உலகெங்கிலும் இளைஞர்களின் எதிர்ப்பு அலை தீவிரமடைந்துள்ளது. 
இளைஞர்கள் இவ்வாறு வீதியில் இறங்குவதற்குப் பின்னணியில் உயர்கல்வி கற்ற பின்னரும் தகுதியான வேலை கிடைக்காமை, வாழ்க்கைச் செலவு அதிகரிப்பு மற்றும் எதிர்காலம் குறித்த பாதுகாப்பற்ற தன்மை போன்ற பொருளாதார நெருக்கடிகள் முக்கியக் காரணமாக அமைகின்றன.
 இதனுடன் இந்தியாவில் நீட் (NEET) தேர்வு வினாத்தாள் கசிவு, தேர்வு முடிவுகளில் குழப்பம் மற்றும் SIR முறைகேடுகள் போன்ற வெளிப்படைத்தன்மையற்ற நிர்வாக நடைமுறைகளும் பெரும் கொந்தளிப்பை ஏற்படுத்தியுள்ளன. மேலும், ஜெர்மனியில் இளைஞர்களுக்கான கட்டாய ராணுவப் பயிற்சி திட்டம் மற்றும் கல்வி/சுகாதாரத் துறைக்கான நிதியைக் குறைத்து பாதுகாப்புத் துறைக்கு ஒதுக்கும் அரசின் முடிவுகள் போன்ற தன்னிச்சைப் போக்கும், ஊழல் மற்றும் பொதுச் சேவைகளின் சீரழிவும் இப்போராட்டங்களை மேலும் தீவிரப்படுத்தியுள்ளன. அரசியல் பார்வையாளர்கள் இப்போராட்டங்களை "டிஜிட்டல் ஜனநாயகத்தின் காலம்" என்று குறிப்பிடுகின்றனர்.   இன்ஸ்டாகிராம், எக்ஸ் (X), வாட்ஸ்அப் மற்றும் FB போன்ற சமூக ஊடகத் தளங்கள் மூலம் தகவல்கள் நொடிப் பொழுதில் சர்வதேச அளவை அடைகின்றன. இதன் மூலம் ஒரு நாட்டில் போராட்டங்களை எவ்வாறு ஒருங்கிணைப்பது, காவல்துறையின் அடக்குமுறைகள் மற்றும் இணையத் தடைகளை (VPN மூலம்) எவ்வாறு எதிர்கொள்வது போன்ற தொழில்நுட்ப உத்திகளை பிற நாட்டு இளைஞர்கள் உடனுக்குடன் கற்றுக்கொள்கின்றனர். 
மேலும், இப்போராட்டங்கள் குறிப்பிட்ட ஒரு தனிநபரைச் சார்ந்திருக்காமல் தலைவரில்லா நெட்வொர்க்காகக் கொள்கைகளின் அடிப்படையில் அமைவதால், அரசே நினைத்தாலும் ஒரு தலைவரைக் கைது செய்து போராட்டத்தை முடக்க முடிவதில்லை. 
அரசியல் பார்வையாளர்களின் கணிப்புப்படி, ஜென்சியினர் குறிப்பிட்ட அரசியல் கட்சிகளின் தொண்டர்களாக இல்லாமல், மக்களின் அடிப்படைப் பிரச்சனைகளை மையமாக வைத்தே போராடுகின்றனர். 
அடுத்த 5 முதல் 10 ஆண்டுகளில் உலகெங்கிலும் உள்ள பெரும்பாலான வாக்காளர்களாகவும், பணியாளர்களாகவும் இவர்களே இருப்பார்கள் என்பதால் வருங்காலத்தில் ஜென்சியின் ஆதிக்கம் நிச்சயமாக அதிகரிக்கும். இந்தியாவில் மட்டுமே 20 கோடிக்கும் அதிகமான Gen Z வாக்காளர்கள் இதற்குச் சிறந்த உதாரணமாக உள்ளனர். பங்களாதேஷ் மற்றும் நேபாளம் போன்ற நாடுகளில் ஆட்சிகளை வீழ்த்தி, எந்த அரசு பதவிக்கு வர வேண்டும் என்பதைத் தீர்மானிக்கும் சக்தியாக இவர்கள் உருவெடுத்துள்ளனர். 
இருப்பினும், நாடாளுமன்றப் பிரதிநிதிகளின் அதிக சராசரி வயது, வாரிசு அரசியல் மற்றும் பண பலம் காரணமாக இளைஞர்கள் நேரடியாக சட்டமன்றம் அல்லது நாடாளுமன்றத்திற்குள் நுழைவது இன்னமும் சவாலாகவே உள்ளது. 
ஜென்சி இளைஞர்கள் தற்சமயம் தெருக்களிலும் சமூக ஊடகங்களிலும் தங்கள் அதிகாரத்தைச் செலுத்தி அரசாங்கங்களைப் பணிய வைக்கிறார்கள். வரும் காலத்தில் இந்த டிஜிட்டல் போராட்டங்களை முறையான அரசியல் கட்சிகளாகவும், அமைப்புகளாகவும் மாற்றினால் மட்டுமே, அவர்கள் விரும்பும் முழுமையான சமூக மாற்றத்தை அடைய முடியும் என அரசியல் ஆர்வலர்கள் சுட்டிக்காட்டுகின்றனர்.